बीरगंज, ७ जेठ — उपचारको क्रममा लापरवाही भएको हुँदा बच्चाको ज्यान गएको भन्दै मृतकका परिवारले बीरगंजको गण्डक अस्पतालमा प्रदर्शन गरेका छन् ।
पर्साको बहुदरमाई नगरपालिका वडा नम्बर १ विश्रामपुर बस्ने श्रीराम महतो कोईरीको १८ महिने छोरा सुजित कुमारलाई झाडापखाला भई गत शनिवार उपचारका लागि गण्डक अस्पतालमा भर्ना गरिएको थियो ।
१३ घण्टा अगाडी सिरिन्जमा लोड गरिएको मोनोसेफ इन्जेक्सन दिदा बालकको मुखबाट फिज आई मृत्यु भएको पिडितका आफन्तले गुनासो गरेका छन् । आईतबार बेलुका झाडा पखाला नियन्त्रण गर्ने एन्टिवायोटिक इन्जेक्सन मोनोसेफ आधा डोज दिएको थियो भने आधा डोज सुईमै लोड गरी राखिएको र १३ घण्टा पछि दिदा सो बालकको मृत्यु भएको बालकका परिवारले बताएका छन् । १३ घण्टा सम्म लोड गरेर राखेको सुई विषाक्त भएको हुन सक्ने आरोप आफन्तले लगाएका छन् ।
बालकको उपचारमा संलग्न चिकित्सक किशोर साहको लापरवाहीले घटना घटेको भन्दै अस्पतालमा पुगेका आफन्त जनले शव बुझन अस्वीकार गर्दै अस्पताल घेराउ गरेका हुन् । मृतकका परिवारले उपचारमा लापरवाही गर्ने चिकित्सकलाई कारवाहीको माग गरेका छन् ।
