काठमाडौं, २४ माघ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले राष्ट्रिय स्वतन्त्र पार्टी (रास्वपा) सभापति रवि लामिछानेको निलम्बनप्रति आपत्ति जनाउँदै सभामुख देवराज घिमिरेलाई ध्यानाकर्षण गराएका छन् ।
बिहीबार प्रतिनिधिसभाको बैठकमा बोल्दै प्रचण्डले अदालतले धरौटीमा रिहा गरेपछि पनि लामिछानेको निलम्बन संवैधानिक र न्यायसंगत छ कि छैन भन्ने विषय पुनः मूल्यांकन गर्न आग्रह गरे ।
प्रचण्डले सरकारलाई राजनीतिक प्रतिशोध लिने प्रवृत्तिमा लागिएको आरोप लगाए। उनले भने, “सरकार आज प्रतिशोध लिने विषयमा बलियो देखिएको छ। राष्ट्रिय स्वतन्त्र पार्टीका सभापति रवि लामिछाने त्यसको सबैभन्दा ठूलो उदाहरण हुनुहुन्छ। उहाँलाई सहकारी ठगका रूपमा देशभर दौडाइएको छ।”
प्रचण्डले न्यायपालिकालाई धम्क्याएर लामिछानेलाई फसाउने प्रयास भइरहेको दाबी गरे। “हिजो अफर गर्नेहरू आज न्यायपालिकालाई धम्क्याएर भए पनि उहाँलाई फसाउने कसरतमा छन्,” उनले आरोप लगाए।
सम्पत्ति शुद्धीकरणको आरोपका कारण सांसद पद निलम्बन हुने प्रक्रियालाई लिएर उनले सम्भावित दुरुपयोगप्रति चिन्ता व्यक्त गरे। प्रचण्डले भने, “अहिले प्रतिशोध लिँदा मज्जा लागेको होला। तर भोलि यही नियम आफैंमाथि लागू भयो भने के होला?”
प्रचण्डको यो अभिव्यक्ति राजनीतिक र न्यायिक प्रक्रियाहरूलाई लिएर बहस पुनः चर्किने संकेतका रूपमा हेरिएको छ ।
