काठमाडाैं, २९ फागुन । बर्दियामा जङ्गली हात्तीको आक्रमणबाट एक वृद्धाको मृत्यु भएपछि आक्रोशित स्थानीयवासीले पूर्वपश्चिम राजमार्ग अवरुद्ध गरेका थिए। ठाकुरबाबा नगरपालिका–२ बलातीका ७१ वर्षीय बोलीराम थारुको गए राति हात्तीको आक्रमणमा परी मृत्यु भएको थियो।
घटनापछि मानव–वन्यजन्तु द्वन्द्वको दिगो समाधानको माग गर्दै स्थानीयले भुरिगाउँ-चिसापानी सडकखण्डअन्तर्गत बलाती क्षेत्रमा राजमार्ग अवरुद्ध गरेका थिए। राजमार्ग अवरुद्ध हुँदा लामो तथा छोटो दूरीका सवारीसाधन रोकिएका थिए।
स्थिति नियन्त्रणमा लिन नेपाल प्रहरी, सशस्त्र प्रहरी र नेपाली सेनाको टोली परिचालन गरिएको थियो। प्रहरीको पहलपछि मध्याह्न १२ बजे राजमार्ग खुलेको जिल्ला प्रहरी कार्यालय बर्दियाका इन्स्पेक्टर एवम् निमित्त सूचना अधिकारी कृष्णा डाँगीले जानकारी दिए ।
राजमार्ग खुल्नासाथ रोकिएका यातायात पुनः सञ्चालनमा आएका छन् । स्थानीयवासीले वन्यजन्तु आक्रमणबाट हुने क्षति रोक्नका लागि दीर्घकालीन समाधान खोज्न सरकारसँग माग गरेका छन् ।
