बीरगन्ज,२५ चैत । बीरगन्ज महानगरपालिका–१६ स्थित भन्सार नजिकैको त्रिभुवन राजपथ सडकखण्डमा अवैध रुपमा सुनचाँदी ओसारपसार गर्दै गरेका दुई भारतीय नागरिक पक्राउ परेका छन्।
सशस्त्र प्रहरी हवल्दार गंग बहादुर विकको नेतृत्वमा खटिएको चेकपोइन्ट टोलीले भारततर्फ जाँदै गरेका सवारी साधन र यात्रुहरूको निगरानीका क्रममा उनीहरूलाई नियन्त्रणमा लिएको हो।
पक्राउ पर्नेहरू भारतको पश्चिम बङ्गाल राज्य, पश्चिम मेदिनीपुर जिल्लाको किशोरनगर निवासी करिब ३५ वर्षीय सौमेन गुचैत र जोतेकानुरामगढ निवासी करिब २५ वर्षीय अमित दास रहेका छन्।
सशस्त्र प्रहरीले दिएको जानकारी अनुसार उनीहरू काठमाडौंका विभिन्न सुनचाँदी पसलहरूसँग मिलेर ग्राहकको अर्डरमा बनाइएको सुन गहना लिएर फरार भएको सूचनाका आधारमा निगरानी बढाइएको थियो।
पक्राउ परेकासँग बरामद गरिएका सामग्रीमा २ सेट सुनका झुम्का (करीब ८२ लाल), १ सेट रिङ (३० लाल), १ थान सिक्री लकेट (३० लाल), १ थान गणेश–लक्ष्मीको सुनको मूर्तिलगायत टुक्रा गरी २ तोला ६६ लाल बराबरको सुन र करीब २ तोला चाँदीको लक्ष्मी मूर्ति रहेको डिएसपी लोकेन्द्र सुब्बाले बताए।
उनीहरूलाई थप अनुसन्धान र आवश्यक कानुनी कारबाहीका लागि प्रहरी चौकी इनरुवामा बुझाइएको सशस्त्र प्रहरीले जनाएको छ। साथै, नेपाल–भारत सीमामा भइरहने अवैध कारोबार रोक्न थप निगरानी कडा बनाइएको पनि प्रहरीको भनाइ छ।
