बीरगन्ज,२९ जेठ । पर्साको जिराभवानी गाउँपालिकालाई पूर्ण साक्षर गाउँपालिका घोषणा गरिएको छ ।सरकारले निर्धारण गरेका साक्षरतासम्बन्धी सबै सूचक तथा मापदण्ड पूरा गरेपछि शुक्रबार आयोजित विशेष समारोहमा गाउँपालिका अध्यक्ष अनोज चौधरीले पालिकालाई औपचारिक रूपमा पूर्ण साक्षर घोषणा गरेका हुन् ।
गाउँपालिकाको सहयोग तथा आसमान नेपालको प्राविधिक सहयोग र समन्वयमा आयाेजित कार्यक्रममा कार्यक्रममा शिक्षा क्षेत्रमा दीर्घकालीन योगदान पुर्याउने नेपाल राष्ट्रिय माध्यमिक विद्यालय सेढवाका शिक्षक रमेश कुमार साहलाई पालिकास्तरीय उत्कृष्ट शिक्षक घोषणा गर्दै नगद ५ हजार रुपैयाँ, सम्मानपत्र तथा दोशल्लासहित सम्मानित पनि गरिएको थियो ।
कार्यक्रमलाई सम्बोधन गर्दै गाउँपालिकअ अध्यक्ष चौधरीले पूर्ण साक्षर घोषणा केवल औपचारिक उपलब्धि नभई गुणस्तरीय, व्यवहारिक तथा प्रविधिमैत्री शिक्षातर्फको नयाँ यात्राको सुरुवात भएको बताए । उनले आगामी दिनमा डिजिटल शिक्षा, सीपमूलक सिकाइ तथा आधुनिक प्रविधिमा आधारित शिक्षालाई प्राथमिकता दिइने प्रतिबद्धता व्यक्त गरे ।
गाउँपालिकाका शिक्षा शाखा प्रमुख शिवराज फुयाँलले साक्षरता अभियान सफल बनाउन सहयोग गर्ने सबै पक्षप्रति आभार व्यक्त गर्दै अब शिक्षाको पहुँचसँगै गुणस्तर अभिवृद्धिमा विशेष ध्यान केन्द्रित गरिने बताए ।
वडा नम्बर १ का वडाध्यक्ष रामशरण खवास थारु र वडा नम्बर २ का वडाध्यक्ष महादेव महतो थारुले पूर्ण साक्षर घोषणा सम्पूर्ण स्थानीयवासीको साझा उपलब्धि भएको उल्लेख गर्दै विद्यालयको गुणस्तर सुधार, बालबालिकाको नियमित उपस्थितिमा वृद्धि तथा समुदायको सहभागिता सुदृढ बनाउन निरन्तर प्रयास गरिने बताए।
आसमान नेपालका कार्यक्रम व्यवस्थापक अजय कुमार यादव, कार्यक्रम अधिकृत धर्मेन्द्र चौरसिया तथा शिक्षकहरू कृपासिन्धु प्रसाद पटवारी र रामाशंकर चौधरीले शिक्षा क्षेत्रमा निरन्तर लगानी, समुदायको सक्रिय सहभागिता तथा विद्यालयहरूको मेहनतका कारण यो उपलब्धि सम्भव भएको धारणा व्यक्त गरे ।
कार्यक्रममा सहभागी विद्यार्थी प्रतिनिधिहरूले शिक्षामा गाउँपालिकाले दिएको प्राथमिकताप्रति खुशी व्यक्त गर्दै आधुनिक तथा प्रतिस्पर्धात्मक युगअनुसार सीपमूलक र प्रविधिमा आधारित शिक्षाको विस्तार आवश्यक रहेको बताए ।
उक्त शिक्षक, विद्यार्थी, अभिभावक, विद्यालय व्यवस्थापन समितिका पदाधिकारी, जनप्रतिनिधि, सञ्चारकर्मी तथा विभिन्न सरकारी तथा गैरसरकारी संस्थाका प्रतिनिधि लगायतकाकाे सहभागिता रहेको थियो ।
