काठमाडौं,२९ जेठ । प्रहरी महानिरीक्षक दानबहादुर कार्कीले प्रहरी कर्मचारीलाई नागरिकलाई केन्द्रमा राखेर सेवा प्रवाह गर्न निर्देशन दिएका छन्।
शुक्रबार नेपाल प्रहरी प्रधान कार्यालयमा सरुवा भएका प्रहरी निरीक्षक (इन्स्पेक्टर) हरूसँगको भेटमा उनले यस्तो निर्देशन दिएका हुन्। आईजीपी कार्कीले प्रहरी कर्मचारीहरूले बोली, व्यवहार र कार्यशैलीमा सुधार ल्याउँदै अनुशासित, कर्तव्यनिष्ठ र व्यावसायिक ढंगले जिम्मेवारी निर्वाह गर्नुपर्ने बताए।
उनले कार्यक्षेत्रमा देखा पर्न सक्ने सुरक्षा चुनौतीहरूको विश्लेषण गरी सोही अनुसार सुरक्षा योजना बनाइ प्रभावकारी कार्यान्वयन गर्नुपर्नेमा जोड दिए। साथै नेपालको संविधान, ऐन तथा कानुनले निर्दिष्ट गरेको जिम्मेवारी पूर्ण निष्ठाका साथ पालन गर्नुपर्ने उनले उल्लेख गरे।
आईजीपी कार्कीले व्यक्तिगत स्वार्थभन्दा संगठनको हितलाई प्राथमिकतामा राख्दै नीति–निर्देशनको प्रभावकारी कार्यान्वयन गर्न र प्रहरी संगठनको साख उच्च राख्ने गरी कार्यसम्पादन गर्नुपर्ने बताए।
