काठमाडौं,३० जेठ । आउँदो हप्ता देशभर मौसममा मिश्रित प्रभाव देखिने भएको छ। मौसमविदका अनुसार विशेषगरी पश्चिम तराईका जिल्लामा गर्मी बढ्नेछ भने पूर्वी क्षेत्रमा वर्षाको सम्भावना बढी रहनेछ।
जल तथा मौसम विज्ञान विभागका मौसमविद डेभिड ढकालका अनुसार बुधबार र बिहीबार लुम्बिनी तथा सुदूरपश्चिम प्रदेशका तराई भेगमा तापक्रम बढेर अत्यधिक गर्मी महसुस हुन सक्छ। यसले ती क्षेत्रका बासिन्दालाई थप सतर्क रहन सुझाव दिइएको छ।
यता कोशी प्रदेशमा भने बिहीबारसम्म विभिन्न स्थानमा मध्यम वर्षा हुने पूर्वानुमान छ। त्यस्तै, मधेश, बागमती र गण्डकी प्रदेशका तराई क्षेत्रमा मंगलबारसम्म केही स्थानमा हल्का वर्षा र त्यसपछि बुधबार–बिहीबार एक/दुई स्थानमा मध्यम वर्षाको सम्भावना रहेको बताइएको छ।
लुम्बिनी र सुदूरपश्चिम प्रदेशमा शुक्रबार र शनिबार थोरै स्थानमा वर्षा हुने भए पनि आइतबारदेखि बिहीबारसम्म एक/दुई स्थानमा मध्यम वर्षा हुन सक्ने अनुमान गरिएको छ।
विशेषगरी शुक्रबार र शनिबार कोशी, बागमती र गण्डकी प्रदेशका केही स्थानमा भारी वर्षाको सम्भावना रहेको मौसमविदको भनाइ छ।
पहाडी क्षेत्रमा पनि कोशी प्रदेशमा बिहीबारसम्म मध्यम वर्षा जारी रहनेछ भने कर्णाली र सुदूरपश्चिमका केही स्थानमा पनि सोही अवधिमा वर्षा हुने अनुमान गरिएको छ। लुम्बिनी प्रदेशमा शनिबारसम्म केही स्थानमा वर्षा हुने सम्भावना छ।
हिमाली क्षेत्रमा समेत कोशी, कर्णाली, सुदूरपश्चिम र लुम्बिनी प्रदेशका केही स्थानमा बिहीबारसम्म हिउँ वा वर्षा पर्न सक्ने पूर्वानुमान छ। बागमती र गण्डकी प्रदेशका उच्च भू-भागमा पनि मंगलबारदेखि बिहीबारसम्म हल्कादेखि मध्यम वर्षा वा हिमपात हुन सक्ने बताइएको छ।
हाल प्रि-मनसुन सक्रिय रहेकाले मेघगर्जन, चट्याङ, हावाहुरी र असिनापानीको जोखिम पनि कायम रहनेछ। मौसमविदहरूले सम्भावित क्षतिबाट जोगिन आवश्यक सावधानी अपनाउन सर्वसाधारणलाई आग्रह गरेका छन्।
