बीरगन्ज, ५ वैशाख । जिल्ला प्रहरी कार्यालय बाराले अपराध र अपराधीसँग सम्बन्धित सूचनाको सार्वजनिककरणमा दोहोरो मापदण्ड अपनाएको भन्दै स्थानीय बासिन्दा आक्रोशित बनेका छन्।
स्थानीयहरूको आरोप छ कि सामान्य अपराधमा संलग्न सर्वसाधारणको तस्बिर, नाम र ठेगाना सार्वजनिक गर्ने प्रहरीले पहुँचवाला र प्रभावशाली व्यक्तिहरूको विवरण भने गोप्य राख्ने गरेको छ।
गत फागुन २८ गते नवजन्म पुनःस्थापना केन्द्रमा प्रदीपप्रसाद मण्डलको मृत्युपछि पक्राउ परेका प्रमुख अभियुक्तमध्ये एक साहेबबाबु मन्सुरको विवरण सार्वजनिक नगर्नु र वैशाख ४ गते व्यवसायीसँग रकम असुली प्रयास गरेको अभियोगमा पक्राउ परेका विष्णु सर्राफको तस्बिर नछापिनु— प्रहरीको निष्पक्षतामाथि प्रश्न उठाउने उदाहरण हुन्।
तर, यस्तै प्रकृतिका मामिलामा संलग्न सर्वसाधारणको विवरण भने प्रहरीले नियमित रूपमा सार्वजनिक गर्दै आएको छ।
स्थानीय बासिन्दाले आरोप लगाएका छन्, “बारा प्रहरी सामान्य नागरिकप्रति कठोर र पहुँचवालाप्रति नरम देखिन्छ।” यसरी दोहोरो मापदण्ड अपनाउँदा प्रहरीप्रति जनविश्वास घटेको र पारदर्शिता संकटमा परेको स्थानीयको भनाइ छ।
जवाफ मागिँदै गर्दा जिल्ला प्रहरी कार्यालय बाराका प्रवक्ता डिएसपी विजयराज पण्डितको फोनसमेत नउठेको जनाइएको छ। स्थानीयले सबैलाई समान व्यवहार गर्न र प्रहरीको निष्पक्षता पुनःस्थापित गर्न तत्काल कदम चाल्न माग गरेका छन्।
