बारा, ६ वैशाख । फेटा गाउँपालिकामा आयोजना हुने श्री चण्डी माई मेलाको व्यवस्थापनलाई सहज बनाउन गम्हरिया फाउन्डेसनले ५० थान टिसर्ट सहयोग गरेको छ। मेलाको सुरक्षात्मक संयोजन र स्वयंसेवक परिचालनलाई प्रभावकारी बनाउन फाउन्डेसनले उक्त सहयोग गरेको हो।
फाउन्डेसनका अध्यक्ष दीपक साहले संस्थाले जनकल्याण, सामाजिक सेवा र धार्मिक आस्थासँग सम्बन्धित कार्यहरूमा सक्रिय सहभागिता जनाउँदै आएको जानकारी दिए।
संस्थाका सचिव अभय कुमार तिवारीले स्वयंसेवकहरूको एकरूपता र अनुशासन सुनिश्चित गर्न टिसर्ट सहयोग गरिएको बताउँदै स्थानीय मेलाको व्यवस्थापन र गरिमा अभिवृद्धिमा सहयोग पुग्ने विश्वास व्यक्त गरे।
मेला समितिका अध्यक्ष राज किशोर साहले गम्हरिया फाउन्डेसनप्रति आभार प्रकट गर्दै भने, “स्वयंसेवकहरूको एउटै पोशाकले मेलामा सुरक्षाको विश्वास बढाउनेछ र अनुशासन कायम राख्न मद्दत पुर्याउनेछ।”
हरेक वर्ष आयोजित हुने श्री चण्डी माई मेला फेटा क्षेत्रको महत्वपूर्ण सांस्कृतिक र धार्मिक कार्यक्रम हो। समितिले फाउन्डेसनको सहयोगलाई सामाजिक सम्मान र मेलाको व्यवस्थित सञ्चालनमा महत्वपूर्ण योगदान भएको बताएको छ।
गम्हरिया फाउन्डेसनले यस्ता परोपकारी कार्यलाई भविष्यमा पनि निरन्तरता दिने प्रतिबद्धता जनाएको छ।
