बीरगन्ज,२६ बैशाख । सामाजिक क्षेत्रको अग्रणी संस्था रिलिफ सोसाइटी अफ कमर्सले आफ्नो ३४औं स्थापना दिवस तथा बुद्ध पूर्णिमा जयन्तीको अवसरमा यही वैशाख २९ गते एक भव्य औपचारिक कार्यक्रम आयोजना गर्ने भएको छ।
कार्यक्रम रिलिफ सोसाइटी भवन, आदर्शनगर (ठा.रा. कलेजपछाडि) मा दिउँसो ४ बजे सुरु हुनेछ। सोसाइटीका अध्यक्ष योगेन्द्र प्रसाद यादवका अनुसार, समाजमा प्रेरणादायी योगदान दिने व्यक्तित्वहरूको सम्मान गर्दै सकारात्मक सोच र सेवा भाव फैलाउने उद्देश्यका साथ कार्यक्रमको आयोजना गरिएको हो।
यस अवसरमा साहित्य, चिकित्सा, खेलकुद, समाजसेवा तथा महिला उद्यम क्षेत्रका पाँच विशिष्ट व्यक्तित्वहरूलाई सम्मान गरिनेछ। सम्मानित हुने व्यक्तित्वहरू यसप्रकार छन्: जयकिशोर पाण्डे – साहित्य क्षेत्र, डा. भरत गोइत – चिकित्सा क्षेत्र, सविन बस्नेत, अध्यक्ष, भेटान्स सिटी क्लब, वीरगञ्ज – खेलकुद क्षेत्र, द्या कुमारी सारावगी, अध्यक्ष, उपकार सेवा नेपाल – समाजसेवा क्षेत्र, आरती सिंह – महिला उद्यम क्षेत्र छन ।
अध्यक्ष यादवले भने, “हामी प्रत्येक वर्ष समाजमा योगदान पुर्याउने अग्रणी व्यक्तित्वहरूको सम्मान गर्दै आएका छौं। यस परम्परालाई निरन्तरता दिँदै यस वर्ष पनि समाजका प्रेरक व्यक्तिहरूलाई सम्मान गरिनेछ।”
कार्यक्रममार्फत गौतम बुद्धको शिक्षालाई स्मरण गर्दै शान्ति, सेवा र सद्भावको सन्देश फैलाउने उद्देश्य पनि राखिएको छ। कार्यक्रममा स्थानीय विशिष्ट व्यक्तित्वहरू, समाजसेवी, व्यापारी, बुद्धिजीवी, शिक्षाविद् तथा सर्वसाधारणको उपस्थिति रहने अपेक्षा गरिएको छ। रिलिफ सोसाइटीले यो कार्यक्रममार्फत समाजमा सेवा र योगदानको मूल्याङ्कन गर्ने संस्कृतिको प्रवर्द्धन गर्ने विश्वास व्यक्त गरेको छ।
