काठमाडौं,०८ जेठ । चालु आर्थिक वर्षको साउनदेखि वैशाखसम्मको १० महिनामा नेपालको व्यापार घाटा १२ खर्ब ५६ अर्ब रुपैयाँ नाघेको छ।
भन्सार विभागले सार्वजनिक गरेको पछिल्लो तथ्याङ्कअनुसार अघिल्लो वर्षको यही अवधिको तुलनामा व्यापार घाटा झन्डै ७ प्रतिशतले बढेको छ। गएको आर्थिक वर्षको साउनदेखि वैशाखसम्म व्यापार घाटा ११ खर्ब ७७ अर्ब रुपैयाँ रहेको थियो भने यो वर्ष सोही अवधिमा त्यो बढेर १२ खर्ब ५६ अर्ब २७ करोड रुपैयाँ पुगेको हो।
उक्त अवधिमा देशले १४ खर्ब ७४ अर्ब रुपैयाँभन्दा बढीको वस्तु आयात गरेको छ, जुन अघिल्लो वर्षको तुलनामा १३.११ प्रतिशतले धेरै हो। यद्यपि निर्याततर्फ भने सुधार देखिएको छ। १० महिनामा नेपालले २ खर्ब १७ अर्ब ९१ करोड रुपैयाँ बराबरको वस्तु निर्यात गरेको छ, जुन अघिल्लो वर्षको तुलनामा ७२.७१ प्रतिशतले वृद्धि हो।
निर्यात वृद्धि उत्साहजनक देखिए पनि आयातको तीव्र वृद्धिले समग्र व्यापार सन्तुलनमा नकारात्मक असर पारिरहेको छ। अर्थशास्त्रीहरू भन्छन्— निर्यातमुखी नीति, स्वदेशी उत्पादनमा लगानी र आयात प्रतिस्थापन रणनीति अवलम्बन नगरेसम्म व्यापार घाटा न्यून गर्न गाह्रो हुन्छ।
