काठमाडाैं,१३ जेठ । बङ्गलादेशको सर्वोच्च अदालतले जमात–ए–इस्लामीका वरिष्ठ नेता एटीएम अजहरुल इस्लामलाई मानवता विरुद्धको अपराधमा दिइएको मृत्युदण्ड फैसला उल्टाउँदै मंगलबार उनलाई निर्दोष ठहर गरेको छ। यस निर्णयसँगै इस्लामको झन्डै १३ वर्ष लामो कैद जीवन समाप्त हुने भएको छ।
सन् २०१२ देखि हिरासतमा रहेका इस्लामलाई सन् २०१४ मा १९७१ को स्वतन्त्रता युद्धको क्रममा गरेको भनिएको नरसंहारलगायतका गम्भीर आरोपमा दोषी ठहर गरी मृत्युदण्ड सुनाइएको थियो। जमात–ए–इस्लामीले सो युद्धमा पाकिस्तानको पक्ष लिएको इतिहास छ, जसले दलको छविमा गहिरो प्रभाव पारेको थियो।
इस्लामका वकिल शिशिर मोनिरले सर्वोच्च अदालतको यो निर्णयलाई न्यायको विजयको रूपमा व्याख्या गर्दै अन्य अभियुक्तहरूका मुद्दामा पनि पुनरावलोकन आवश्यक रहेको बताएका छन्।
यसअघि इस्लामसहित पाँच जना वरिष्ठ नेताहरूलाई युद्ध अपराधमा दोषी ठहर गरिएको थियो, जसमा चार जना जमात–ए–इस्लामीका र एक जना बङ्गलादेश नेशनल पार्टी (BNP) का थिए।
राजनीतिक तवरमा हेर्दा, देश अहिले आगामी निर्वाचनको तयारीमा जुटिरहेको छ। अन्तरिम सरकारले सन् २०२६ भित्र चुनाव सम्पन्न गराउने प्रतिबद्धता जनाइसकेको छ भने विभिन्न दलहरू चुनाव लक्षित रणनीतिमा सक्रिय देखिन्छन्।
