वीरगन्ज,०५ असार । नेकपा (एकीकृत समाजवादी)का उपमहासचिव तथा दाङ–१ बाट निर्वाचित सङ्घीय सांसद मेटमणि चौधरी बैंकिङ कसुरसम्बन्धी विवादमा तानिएका छन्।
उनीविरुद्ध चेक अनादर (बाउन्स)को आरोपमा प्रहरीमा जाहेरी दर्ता भएको छ। दाङ जिल्ला प्रहरी कार्यालयले दिएको जानकारीअनुसार, सांसद चौधरीविरुद्ध ५ करोड ४० लाख रुपैयाँ बराबरको चेक अनादर गरेको भन्दै उजुरी परेको छ। जिल्ला प्रहरी प्रमुख (एसपी) अर्जुन तिमिल्सिनाका अनुसार जाहेरी हुलाक मार्फत आएको र त्यसको आधिकारिकता प्रमाणित (भेरीफाई) गर्ने काम बाँकी रहेको छ।
यो घटनाले राजनीतिक वृत्तमा चर्चा पाएको छ, मेटमणि चौधरी सत्ता गठबन्धनको एक प्रमुख दलका उपमहासचिव र सक्रिय सांसद हुन्। प्रहरीले हालसम्म कसले र कहाँबाट यो जाहेरी दर्ता गराएको हो भन्ने विस्तृत विवरण सार्वजनिक गरेको छैन। जाहेरीको भेरिफिकेशनपछि यस सम्बन्धमा थप अनुसन्धान अगाडि बढ्ने प्रहरीले जनाएको छ।
