काठमाडाैं,१३ साउन । भारतको झारखण्ड राज्यमा हिन्दु तीर्थयात्री बोकेको बस र खाना पकाउने ग्यास सिलिन्डर भरिएको ट्रकबीच ठोक्किँदा कम्तीमा १८ जनाको मृत्यु भएको छ। मङ्गलबार बिहान भएको यो भीषण दुर्घटनाले समग्र भारतलाई स्तब्ध बनाएको छ।
स्थानीय अधिकारीका अनुसार तीर्थयात्रीहरू श्रावण महिनाको अवसरमा भगवान् शिवलाई अर्पण गर्न गङ्गाबाट पवित्र जल बोकी देवघरस्थित पवित्र स्थलतर्फ जाँदै थिए। यही क्रममा ग्यास ट्रकसँग ठोक्किएपछि बसमा आगलागी भई पछाडिको भाग पूर्ण रूपमा जलेको दृश्य सार्वजनिक भएको छ।
झारखण्डका सांसद निशिकान्त दुबेले १८ भक्तजनको घटनास्थलमै मृत्यु भएको पुष्टि गरेका छन्। उनले सामाजिक सञ्जालमार्फत मृतकप्रति श्रद्धाञ्जलि अर्पण गर्दै यसलाई निकै दर्दनाक क्षण भनेका छन्।
भारतका प्रधानमन्त्री नरेन्द्र मोदीले पनि घटनाप्रति गहिरो दुःख व्यक्त गरेका छन्। “झारखण्डको देवघरमा भएको सडक दुर्घटना अत्यन्त दुःखद छ। मृतकका परिवारजनप्रति हार्दिक समवेदना प्रकट गर्दछु,” प्रधानमन्त्री कार्यालयले सामाजिक सञ्जालमार्फत जनाएको छ।
भारतमा सडक दुर्घटना गम्भीर समस्या बनेको छ। यातायातमन्त्री नितिन गडकरीले संसद्लाई दिएको जानकारी अनुसार, सन् २०२३ मा मात्रै एक लाख ७२ हजारभन्दा बढी मानिसले सडक दुर्घटनामा ज्यान गुमाएका छन्।
यो दुर्घटनाले भारतीय सडक सुरक्षामाथि पुनः प्रश्न उठाएको छ। गत नोभेम्बरमा पनि उत्तराखण्डमा बस खोंचमा खस्दा ३६ यात्रुको मृत्यु भएको थियो।
