काठमाडौँ, १३ मंसिर । नेपाल प्रिमियर लिग (एनपीएल) क्रिकेटको पहिलो चरणमा लुम्बिनी लायन्सले पोखरा एभेञ्जर्सलाई ३ विकेटले पराजित गर्दै दोस्रो जित दर्ता गरेको छ।
कीर्तिपुरस्थित त्रिवि क्रिकेट रंगशालामा भएको खेलमा पोखराले टस जितेर ब्याटिङ सुरु गर्यो र ५ विकेट गुमाउँदै १५० रन बनायो। एडम रोसिङ्टोनले ८१ रन र जिम्मी निशमले अविजित ५१ रन बनाए। लुम्बिनीका शेर मल्ल र तिलक भण्डारीले समान २–२ विकेट लिएका छन् भने गुल्बादिन नइबले १ विकेट लिए।
लुम्बिनीले १५१ रनको लक्ष्य १९ ओभर ४ बलमा ७ विकेट गुमाएर पूरा गर्यो। कप्तान रोहितकुमार पौडेलले ४०, निरोशन डिकवेलाले ३७ र सन्दीप जोराले अविजित २२ रन बनाए। पोखराका बिपिन खत्री, सागर ढकाल र म्याट टेलरले समान २–२ विकेट लिए भने जिम्मी निशमले १ विकेट लिए।
यो जीतसँगै लुम्बिनी तालिकामा २ स्थान उक्लँदै पाँचौं स्थानमा ४ अंकसहित पुगेको छ। हारसँगै पोखरा सातौं स्थानमा झरेको छ।
आज दिउँसो साढे ३ बजे सुदूरपश्चिम रोयल्स र जनकपुर बोल्ट्सबीच अर्को खेल हुँदैछ। चार खेल खेलिसकेको सुदूरपश्चिम अहिलेसम्म अपराजित रहेको छ र ८ अंकसहित तालिकाको शीर्ष स्थानमा छ। तीन खेलमा एक पनि जित हासिल नगरेको साविक विजेता जनकपुर भने तालिकाको पुछारमा अङ्कविहीन छ।
हाल तालिकामा विराटनगर ८ अंकसहित दोस्रो, काठमाडौँ ६ अंकसहित तेस्रो, चितवन ४ अंकसहित चौथो र कर्णाली २ अंकसहित छैठौं स्थानमा रहेका छन्। एनपीएलमा आठ फ्रेन्चाइज टोली सहभागी छन् र प्रतियोगिता मंसिर १ गतेदेखि २७ गतेसम्म सञ्चालन भइरहेको छ।
