काठमाडाै,०२ फागुन । अमेरिकी राष्ट्रपति डोनाल्ड ट्रम्पले इरानसँगको बढ्दो तनावलाई मध्य नजर गर्दै मध्यपूर्वतर्फ दोस्रो अमेरिकी विमानवाहक पोत यूएसएस जेराल्ड आर फोर्ड पठाउने निर्णय गरेका छन्।
यो पोत पहिले नै मध्यपूर्वमा कार्यरत अन्य युद्धपोतहरूसँगै सञ्चालनमा आउनेछ र अमेरिकाको केन्द्रिय कमान क्षेत्रमा दुई विमानवाहक समूहको उपस्थिति सुनिश्चित गर्नेछ। ट्रम्पले यस कदमको उद्देश्य इरानमाथि नयाँ परमाणु सम्झौता गर्न सकारात्मक दबाब सिर्जना गर्नु रहेको बताएका छन्। उनले भने, “यदि इरानसँगको सम्झौता असफल भयो भने यो पोत आवश्यक पर्न सक्छ।”
अमेरिकी राष्ट्रपतिले इरानमा सत्ता परिवर्तन सबैभन्दा राम्रो विकल्प हुनसक्ने संकेत पनि गरेका छन्। पछिल्ला केही महिनामा इरानमा भएका देशव्यापी प्रदर्शन र सरकारको कडा प्रतिक्रिया आन्तरिक राजनीतिमा दबाब सिर्जना गरेको देखिन्छ।
विशेषज्ञहरूले यस कदमलाई इरानसँगको कूटनीतिक संवाद सुदृढ गर्ने र आवश्यक परे सावधानीपूर्वक सैन्य विकल्प तयारी गर्ने उपायका रूपमा व्याख्या गरेका छन्। तर, मध्यपूर्वमा अमेरिकी सैन्य विस्तारले क्षेत्रीय सुरक्षा र कूटनीतिक सन्तुलनमा महत्त्वपूर्ण प्रभाव पार्न सक्छ र सम्भावित द्वन्द्वको जोखिम बढाउने चेतावनी पनि दिइएको छ।
