महोत्तरी,१५ फागुन । महोत्तरी निर्वाचन क्षेत्र नम्बर–३ बाट प्रतिनिधिसभा सदस्यका लागि जनता समाजवादी पार्टी (जसपा) नेपालकी उम्मेदवार डा. मिनाक्षी ठाकुर चुनावी मैदानमा छन्। तर उनको यात्रा सहज भने देखिएको छैन। पार्टीभित्रै ‘वंशवाद’को आरोप लाग्दै आलोचना भइरहेको छ, विशेष गरी मधेस आन्दोलन र संगठन निर्माणमा दशकौँ योगदान पुर्याएका पुराना नेताहरूलाई पन्छाएर उनलाई टिकट दिलाइएको भन्दै विवाद सिर्जना भएको हो।
४१ वर्षीया डा. मिनाक्षी ठाकुर पेशाले चिकित्सक हुन्। सर्लाहीको मलंगवा नगरपालिका–नयाँबस्तीमा जन्मिएकी उनी लामो समय काठमाडौंका प्रतिष्ठित अस्पताल र क्लिनिकमा स्त्री तथा प्रसूति रोग विशेषज्ञका रूपमा सेवा दिँदै आएकी छन्।
उनको राजनीतिक यात्रा मुख्य रूपमा उनका पिता महन्थ ठाकुरसँग जोडिएको छ। महन्थ ठाकुर मधेस आन्दोलन र नेपाली राजनीतिमा झण्डै पाँच दशकदेखि सक्रिय रहेका सम्मानित नेता हुन्। महोत्तरी–३ क्षेत्र उनी राजनीतिक ‘अभेद्य गढ’ मान्दै आएका थिए र २०७४ तथा २०७९ का प्रतिनिधिसभा निर्वाचनमा भारी मतान्तरले जित हासिल गरेका थिए।
तर यसपटक स्थिति अलि भिन्न छ। ८० वर्ष नाघेका महन्थ ठाकुर हालै राष्ट्रिय सभा सदस्य निर्वाचित भएर माथिल्लो सदनमा लागेपछि आफ्नो रिक्त क्षेत्रमा छोरी मिनाक्षीलाई उत्तराधिकारीका रूपमा अघि सारेका हुन्। वर्षौँदेखि बाबुले सिञ्चित गरेको राजनीतिक धरातल जोगाउनु र त्यसलाई नयाँ पुस्ताको गतिशीलतासँग जोड्नु उनको मुख्य चुनौती बनेको छ।
डा. मिनाक्षी यसअघि तराई–मधेस लोकतान्त्रिक पार्टी र पछि जसपा नेपालको केन्द्रीय सदस्य रहिसकेकी छन्।
