काठमाडाै,२९ चैत । भारतीय संगीत जगतकी महान् गायिका आशा भोस्लेको ९२ वर्षको उमेरमा निधन भएको छ। केही महिनादेखि अस्वस्थ रहँदै आएकी उनलाई मुटु तथा श्वासप्रश्वाससम्बन्धी समस्या देखिएपछि मुम्बईस्थित ब्रीच क्यान्डी अस्पतालमा भर्ना गरिएको थियो। गम्भीर अवस्थामा आईसीयूमा उपचार भइरहेकै क्रममा शनिबार राति उनको निधन भएको हो।
उनको निधनको पुष्टि उनका छोरा आनन्दले आइतबार गरेका हुन् भने भारतीय सञ्चारमाध्यमहरूले पनि यो खबर सार्वजनिक गरेका छन्। परिवारका अनुसार उनको अन्त्येष्टि सोमबार गरिनेछ।
७ दशकभन्दा लामो सांगीतिक यात्रामा उनले हजारौँ गीतमा स्वर दिँदै भारतीय मात्र नभई विश्व संगीतमा गहिरो प्रभाव छोडेकी थिइन्। उनका गीतहरू पुस्तौँदेखि लोकप्रिय रहँदै आएका छन्।
सन् १९३३ मा जन्मिएकी भोस्लेले बाल्यकालदेखि नै गायन यात्रा सुरु गरेकी थिइन्। सन् १९४३ मा पहिलो फिल्म गीत रेकर्ड गरेकी उनले १९५० को दशकसम्म बलिउडमा बलियो पहिचान बनाइसकेकी थिइन्। त्यसपछि तीन दशकसम्म उनी अधिकांश संगीतकारहरूको रोजाइकी गायिका बनिरहेकी थिइन्।
सुरुआती चरणमा नृत्यप्रधान गीतमा सीमित गरिए पनि उनले आफ्नो कला विस्तार गर्दै गजल गायनमा पनि उत्कृष्टता देखाइन्। Umrao Jaan जस्ता फिल्मका गीतहरूमा उनको गायन विशेष प्रशंसित भएको थियो।
उनी सात पटक फिल्मफेयर पुरस्कारबाट सम्मानित भएकी थिइन् भने ‘दिल चीज क्या है’ र ‘इजाजत’ फिल्मको ‘मेरा कुछ सामान’ गीतका लागि दुई पटक राष्ट्रिय फिल्म पुरस्कार जितेकी थिइन्।
भारतीय फिल्म संगीतमा उनको स्थान प्रायः उनकी दिदी लता मंगेशकरसँग तुलना गरिन्थ्यो।
उनको निधनसँगै भारतीय संगीतले एक युगको अन्त्य भएको महसुस गरिएको छ।
