काठमाडौं,१५ जेठ । सरकारले उद्योग क्षेत्रलाई राहत दिने उद्देश्यले २७३ प्रकारका औद्योगिक कच्चा पदार्थमा भन्सार महसुल घटाएको छ।
शुक्रबार आगामी आर्थिक वर्षको बजेट प्रस्तुत गर्दै अर्थमन्त्री स्वर्णिम वाग्लेले स्वदेशी उद्योगको उत्पादन लागत कम गर्न तथा औद्योगिक वातावरणलाई सहज बनाउन कच्चा पदार्थमा लाग्ने भन्सार दर घटाइएको जानकारी दिए।
उनका अनुसार औद्योगिक कच्चा पदार्थको भन्सार दर तयारी वस्तुको भन्दा कम्तीमा एक तह कम हुने व्यवस्था गरिएको छ। यसबाट स्वदेशी उत्पादनलाई प्रोत्साहन पुग्ने तथा उद्योग व्यवसायको प्रतिस्पर्धात्मक क्षमता बढ्ने सरकारको विश्वास छ।
सरकारले उद्योगमैत्री नीति अन्तर्गत उत्पादनमूलक क्षेत्रलाई प्राथमिकता दिँदै कच्चा पदार्थ आयातमा सहुलियत दिएको जनाएको छ। उद्योगी व्यवसायीहरूले लामो समयदेखि कच्चा पदार्थमा उच्च भन्सार दरका कारण उत्पादन लागत बढेको गुनासो गर्दै आएका थिए।
भन्सार महसुल घटाउने निर्णयले स्वदेशी उद्योगको लागत घट्नुका साथै रोजगारी सिर्जना र आन्तरिक उत्पादन वृद्धि हुने अपेक्षा गरिएको छ।
