काठमाडौं, २८ जेठ । पेन्ट उत्पादन तथा बिक्री गर्दै आएको सर्वोत्तम पेन्ट्सले आजदेखि सर्वसाधारणका लागि आफ्नो प्रारम्भिक सार्वजनिक निष्कासन (आईपीओ) खुला गरेको छ। कम्पनीले जारी पूँजी ३४ करोड रुपैयाँको २५ प्रतिशत बराबर ८ लाख ५० हजार कित्ता सेयर निष्कासन गर्न लागेको हो।
वैदेशिक रोजगारीमा रहेका नेपाली, सामूहिक लगानी कोष तथा कर्मचारीका लागि छुट्याइएको हिस्सा बाहेक बाँकी ७ लाख ५ हजार ५ सय कित्ता सेयर सर्वसाधारणले आवेदन दिन सक्नेछन्। इच्छुक लगानीकर्ताले असार २ गतेसम्म न्यूनतम १० कित्ता र अधिकतम ५ हजार कित्तासम्म आवेदन दिन सक्नेछन्। आवेदन मेरोसेयर तथा सी–आस्बा सदस्य बैंक तथा वित्तीय संस्थामार्फत गर्न सकिने व्यवस्था गरिएको छ।
कम्पनीको अवस्था कस्तो छ?
कैलालीको अत्तरियामा मुख्य कार्यालय रहेको सर्वोत्तम पेन्ट्सले आफ्नै ब्रान्डअन्तर्गत विभिन्न प्रकारका रङ उत्पादन तथा बजारमा बिक्री गर्दै आएको छ। कम्पनीका अनुसार आईपीओबाट उठेको रकम उत्पादन क्षमता विस्तार तथा व्यवसाय विस्तारमा प्रयोग गरिनेछ।
गत पुस मसान्तसम्मको अपरिस्कृत वित्तीय विवरण हेर्दा कम्पनीको प्रति सेयर नेटवर्थ ११६.४१ रुपैयाँ रहेको छ भने प्रति सेयर आम्दानी (EPS) ७.५८ रुपैयाँ छ। त्यस्तै कम्पनीले ४ करोड १८ लाख रुपैयाँ सञ्चित नाफा कायम गरेको देखिन्छ।
लगानी विश्लेषणका दृष्टिले कम्पनीको साधारण पेब्याक अवधि ६.६ वर्ष र डिस्काउन्टेड पेब्याक अवधि ७.१ वर्ष रहेको छ, जसले लगानी फिर्ता हुन केही समय लाग्ने संकेत गर्छ।
कम्पनीले केयर रेटिङ नेपाल बाट “BB-” (बीबी माइनस) रेटिङ प्राप्त गरेको छ। यो रेटिङले कम्पनी दायित्व वहन गर्ने क्षमतामा औसत स्तरमा रहेको जनाउँछ, तर उच्च गुणस्तरका कम्पनीहरूजस्तो बलियो वित्तीय स्थिति भने नरहेको संकेत पनि दिन्छ।
सर्वोत्तम पेन्ट्स उत्पादनमूलक क्षेत्रमा रहेको कम्पनी हो, जुन नेपालको निर्माण तथा पूर्वाधार क्षेत्रमा हुने गतिविधिसँग प्रत्यक्ष रूपमा जोडिएको छ। कम्पनी नाफामा रहेको, नेटवर्थ अंकित मूल्यभन्दा माथि रहेको तथा विस्तार योजनासहित बजारमा आएको सकारात्मक पक्ष मान्न सकिन्छ। तर मध्यम स्तरको क्रेडिट रेटिङ, सीमित सञ्चालन इतिहास तथा उद्योगमा प्रतिस्पर्धा जस्ता पक्षलाई पनि ध्यान दिन आवश्यक छ।
