नवलपरासी,३० जेठ । भौतिक संरचना, आर्थिक स्रोत र प्राविधिक जनशक्तिको अभावका कारण करोडौँ मूल्यका डायलासिस मेसिन प्रयोगविहीन अवस्थामा रहेका छन्। विभिन्न दातृ निकाय तथा नेपाल सरकारमार्फत स्थानीय तह र अस्पतालहरूलाई उपलब्ध गराइएका उपकरणहरू सञ्चालनमा नआएपछि स्वास्थ्य सेवा प्रभावित भएको छ।
नेपाल सरकारको समन्वयमा रोटरी क्लब धुलिखेलले बर्दघाट नगरपालिका–१४ स्थित सहिद स्मृति अस्पताललाई उपलब्ध गराएको करिब १ करोड २० लाख रुपैयाँ बराबरका ६ वटा डायलासिस मेसिन सञ्चालनमा आउन सकेका छैनन्। अस्पताल व्यवस्थापन समितिका अध्यक्ष डिबीबहादुर थापाका अनुसार आवश्यक संरचना र आर्थिक स्रोत अभावका कारण उपकरण प्रयोगमा ल्याउन नसकिएको हो, जसले गर्दा स्थानीय बिरामीहरू सेवा लिनबाट वञ्चित भएका छन्।
त्यस्तै, बुटवलस्थित मुटु अस्पतालले केही समयअघि सुनवल नगरपालिकालाई उपलब्ध गराएको करिब साढे ८ करोड रुपैयाँ मूल्यका ५ वटा डायलासिस मेसिन पनि प्रयोगविहीन छन्। नगरपालिकाले आफ्नै अस्पताल सञ्चालनमा नआएकाले मेसिन प्रयोगमा ल्याउन नसकिएको जनाएको छ। सुनवल नगरप्रमुख विमला अर्यालका अनुसार १५ शय्याको अस्पताल निर्माणाधीन अवस्थामा रहेकाले उपकरण सञ्चालनमा ढिलाइ भएको हो।
उता रामग्रामस्थित पृथ्वीचन्द्र जिल्ला अस्पतालमा भने रहेका ५ वटा डायलासिस मेसिनले दैनिक १७ जना बिरामीलाई सेवा दिइरहेका छन्। तर बढ्दो बिरामी चापका कारण सेवा पर्याप्त नहुँदा धेरै बिरामी अन्यत्र जान बाध्य छन्।
अस्पतालका व्यवस्थापक सीमा काफ्लेका अनुसार अन्य स्थानमा रहेका प्रयोगविहीन मेसिन सञ्चालनमा ल्याउन सकेमा बिरामीलाई ठूलो राहत मिल्नेछ। स्थानीयवासीले स्वास्थ्य उपकरण भएर पनि सेवा नपाउनु विडम्बनापूर्ण अवस्था भएको बताएका छन्।
