काठमाडौँ,०२ असार । नक्कली भुटानी शरणार्थी प्रकरणसम्बन्धी मुद्दा सुनुवाइ ‘हेर्दाहेर्दै’मा राखिएको छ। लगातार पाँच दिनदेखि जिल्ला अदालतमा बहस चलिरहेको यो मुद्दा भोलि (बुधबार) का लागि पुनः पेसी तोकिएको छ।
काठमाडौँ जिल्ला अदालत का न्यायाधीश तेजबहादुर खड्काको इजलासमा गत जेठ २७ गतेदेखि निरन्तर सुनुवाइ भइरहेको यो मुद्दा फाइल अध्ययन र समय व्यवस्थापनका कारण आज अपराह्नपछि स्थगित गरिएको हो।
यस मुद्दामा बहसका लागि सयौँ कानुन व्यवसायीले नाम टिपाएका छन्। तर ठूलो संख्याका वकिलका कारण बहसको समय व्यवस्थापन गर्न कठिनाइ भएकाले अदालतले समय छोट्याउन र व्यवस्थित रूपमा बहस गर्न आग्रह गर्दै आएको छ।
यो प्रकरणमा नेपाली नागरिकलाई नक्कली भुटानी शरणार्थी बनाएर अमेरिका लगायतका देशमा पठाउने भन्दै ठूलो रकम असुली गरिएको आरोप छ। सोही अभियोगमा कीर्ते, ठगी, सङ्गठित अपराध र राज्यविरुद्धको अपराधसम्बन्धी मुद्दा दायर गरिएको हो।
२०८० जेठ १० मा दायर अभियोगपत्रअनुसार यस मुद्दामा पूर्व उपप्रधानमन्त्री तथा एमाले नेता टोपबहादुर रायमाझी, पूर्व गृहमन्त्री तथा कांग्रेस नेता बालकृष्ण खाँण, तत्कालीन गृहमन्त्री रामबहादुर थापा का सुरक्षा सल्लाहकार इन्द्रजित राई, पूर्व गृह सचिव टेकनारायण पाण्डे लगायत ३० जनाविरुद्ध मुद्दा दायर गरिएको थियो।
यसैगरी शरणार्थी नेता टेकनाथ रिजाल सहित अन्य बिचौलिया र सहयोगीहरू पनि अभियुक्त छन्। उनीहरूमाथि ठगी र संगठित गिरोह बनाएर गैरकानुनी रूपमा कागजात तयार पारेको आरोप छ।
यस मुद्दामा सुरुमा पक्राउ परेकामध्ये केही थुनामा छन् भने केही धरौटीमा छुटेका छन्। केही अभियुक्त अझै फरार रहेका छन्। पछिल्ला वर्षहरूमा पूरक अभियोगसमेत दायर भई मुद्दा थप विस्तारित भएको छ।
अदालतले हालसम्मका प्रमाणका आधारमा मुद्दालाई निरन्तर सुनुवाइ गर्दै अघि बढाइरहेको छ भने यो प्रकरण देशकै चर्चित भ्रष्टाचार तथा मानव तस्करी मुद्दामध्ये एक मानिन्छ।
