काठमाडौं,०५ असार । प्रतिनिधि सभा निर्वाचनमा ऐतिहासिक सफलता हासिल गर्दै मुलुकको सबैभन्दा ठूलो राजनीतिक शक्ति बनेको राष्ट्रिय स्वतन्त्र पार्टी (रास्वपा) आफ्नो प्रथम महाधिवेशनको तयारीमा जुटेको छ। पार्टी स्थापना भएको चार वर्ष पूरा भएको अवसरमा ७ असारदेखि चितवनमा सुरु हुने महाधिवेशनले संगठन, नीति र नेतृत्वलाई औपचारिक रूप दिने अपेक्षा गरिएको छ।
महाधिवेशनअघि वडा, पालिका, जिल्ला र प्रदेश तहका संरचना निर्माण गरिसकेको रास्वपाले अब केन्द्रीय संरचनालाई अनुमोदन गर्नेछ। यद्यपि सभापति पदमा रवि लामिछानेको नेतृत्वलाई निरन्तरता दिने सहमति बनेकाले शीर्ष नेतृत्वमा प्रतिस्पर्धा हुने सम्भावना कम देखिएको छ।
पार्टी नेताहरूका अनुसार महाधिवेशनको मुख्य उद्देश्य विभिन्न पृष्ठभूमिबाट आएका नेता, कार्यकर्ता र समर्थकलाई एउटै संगठनात्मक ढाँचामा बाँध्नु हो। रास्वपामा पूर्वराजनीतिक दलका सदस्य, नागरिक अभियन्ता, जेनजी आन्दोलनका अगुवा, विवेकशील साझा समूह, थारुहट आन्दोलनका प्रतिनिधि तथा विभिन्न क्षेत्रका पेशाकर्मीहरू आबद्ध छन्।
राजनीतिक विश्लेषकहरूका अनुसार रास्वपाको चुनौती अब चुनावी सफलतालाई दीर्घकालीन संगठनमा रूपान्तरण गर्नु हो। महाधिवेशनले पार्टीभित्र लोकतान्त्रिक अभ्यासलाई संस्थागत गर्ने, नेतृत्व चयन प्रक्रियालाई औपचारिकता दिने तथा साझा वैचारिक आधार निर्माण गर्ने अवसर प्रदान गर्नेछ।
रास्वपाले पछिल्लो निर्वाचनमा दुई तिहाइ नजिकको जनमत प्राप्त गर्दै १८२ सिटसहित प्रतिनिधि सभामा बहुमत हासिल गरेको थियो। यस्तो अभूतपूर्व जनसमर्थनलाई टिकाइराख्न स्पष्ट नीति, प्रभावकारी संगठन र साझा दृष्टिकोण आवश्यक रहेको पार्टी नेताहरूको भनाइ छ।
महाधिवेशनले आगामी स्थानीय र प्रदेश निर्वाचनका लागि संगठन सुदृढ गर्ने, उम्मेदवार छनोटको आधार तयार गर्ने तथा पार्टीको दीर्घकालीन मार्गचित्र प्रस्तुत गर्ने अपेक्षा गरिएको छ। नेताहरूका अनुसार ५० लाखभन्दा बढी मतदाताको विश्वासलाई संगठनात्मक शक्तिमा रूपान्तरण गर्नु नै महाधिवेशनको सबैभन्दा ठूलो परीक्षा हुनेछ।
यस अर्थमा रास्वपाको प्रथम महाधिवेशन केवल नेतृत्व अनुमोदन गर्ने कार्यक्रम नभई विशाल जनमतलाई संस्थागत राजनीतिक शक्तिमा रूपान्तरण गर्ने ऐतिहासिक प्रयासका रूपमा हेरिएको छ।
