काठमाडौं – संघीय समाजवादी फोरम नेपालको प्रदेश २ मा अध्यक्षको लागि तीनजना प्रतिष्पर्धीले दाबेदारी गरेका छन् ।
शनिबारदेखि शुरु भएको प्रदेश अधिवेशनमा सर्वसम्मति नहुँदा आइतबार साँझदेखि मतदान शुरु भएको छ । अध्यक्षमा रेणु यादव (सप्तरी), विजय यादव (सिरहा) र अशोक यादव (सर्लाही) चुनावी प्रतिस्पर्धा रहेको छ । रेणु यादव पार्टीका केन्द्रीय उपाध्यक्ष हुन् । उनी यसअघि प्रदेशका अध्यक्ष थिइन् ।
त्यसैगरी, विजय यादव केन्द्रीय कोषाध्यक्ष हुन् । हाल उनी प्रदेश २ आर्थिक मामिलामन्त्री पनि हुन् । अशोक यादव प्रदेशसभाका सदस्य हुन् भने पार्टी प्रदेश समितिका सदस्य पनि हुन् ।
चुनावमा तीनजनाको प्रतिष्पर्धा भएपनि रेणु यादव र विजय यादवबीच कडा प्रतिस्पर्धा हुने देखिएको छ । तीनजना उपाध्यक्ष, एकजना महासचिव, सचिव दुईजना, कोषाध्यक्ष एकजनामा सहमति भएको छ भने बाँकी सबै सदस्यको बीचमा प्रतिस्पर्धा भइरहेको प्रतिनिधिसभा सदस्य एवं पर्सा जिल्ला अध्यक्ष प्रदीप यादवले बताए ।
