बाराको गढीमाई मेलामा आयोजना गरिएको कृषि प्रदर्शनी मेला २४ मंसिरमा सम्पन्न भएको छ।
महागढीमाई नगरपालिकामा १८-२४ मंसिरसम्म सञ्चालन भएको यस प्रदर्शनीमा करिब १ लाखले अवलोकन गरेका छन्। आयोजक संस्था कनेक्ट किसानकी अध्यक्ष सञ्जिता लामिछानेका अनुसार प्रदर्शनीले किसान र कृषि उद्यमीलाई नयाँ सम्भावना र प्रविधिसँग जोड्न सहयोग पुर्याएको छ।
१० करोड बराबरका उपकरण बुकिङ
कृषि प्रदर्शनीमा १० करोड रुपैयाँ बराबरका हेभी इक्विपमेन्ट, ट्र्याक्टरलगायतका उपकरण बुकिङ भएका छन्। मेलामा सातै प्रदेशका विशिष्ट परिकार, स्थानीय उत्पादन, रैथाने बाली, र कृषिसम्बन्धी वस्तुहरू प्रदर्शनीमा राखिएका थिए।
आधुनिक प्रविधिको आकर्षण
कृषिमा आधुनिक प्रविधिहरू, नर्सरी, माछा खेतीका नमुना, र रोबोटसँगको कुराकानीजस्ता विशेष कार्यक्रमले मेलालाई थप आकर्षक बनायो। किसानहरूले कृषि तथा पशु सेवाका विशेषज्ञहरूसँग प्रत्यक्ष परामर्श गर्ने अवसरसमेत पाए।
१०० स्टलहरूसहितको व्यापक सहभागिता
प्रदर्शनीमा विभिन्न कम्पनीका १०० स्टलहरू राखिएका थिए। ती स्टलहरूले कृषिमा आधुनिक प्रविधि र सेवाबारे जानकारी गराएका थिए। महागढीमाई नगरपालिकाका मेयर उपेन्द्र यादवले समापन समारोहमा यस प्रदर्शनीले किसानहरूको ज्ञान र क्षमतामा वृद्धि गर्ने विश्वास व्यक्त गरे।
कृषि प्रदर्शनीको उद्घाटन उपप्रधानमन्त्री एवम् शहरी विकासमन्त्री प्रकाशमान सिंहले गरेका थिए भने समापन महागढीमाई नगरपालिकाका मेयर उपेन्द्र यादवले गरेका थिए।
यस प्रदर्शनीले कृषि क्षेत्रको प्रवर्द्धनमा महत्वपूर्ण योगदान पुर्याएको आयोजकहरूको विश्वास छ।
