काठमाडौं, १७ माघ । नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानले ७७ जिल्लाका सभापतिलाई पोखरामा दुई दिने प्रशिक्षण दिने भएको छ। यो कार्यक्रम माघ २२ र २३ गते पोखरामा आयोजना हुने कास्की कांग्रेस सभापति किशोरदत्त बरालले जानकारी दिए ।
प्रशिक्षण कार्यक्रममा पार्टी सभापति शेरबहादुर देउवा, उपसभापति पूर्णबहादुर खड्का, धनराज गुरुङ, महामन्त्री गगन थापा, विश्वप्रकाश शर्मा लगायत केन्द्रीय पदाधिकारीहरूको सहभागिता रहनेछ ।
प्रशिक्षणमा नीति, अनुसन्धान तथा प्रशिक्षण प्रतिष्ठानका अन्य सदस्यहरू स्रोत व्यक्तिका रूपमा सहभागी हुनेछन् भने प्रत्येक जिल्लाका उपसभापति पनि उपस्थित हुने कार्यक्रम छ ।
कांग्रेसको विधानअनुसार सबै तहमा नीति, अनुसन्धान तथा प्रशिक्षण प्रतिष्ठानको प्रमुख उपसभापति हुने व्यवस्था रहेको छ। “उद्घाटन र भाषणका लागि थोरै समय छुट्याइएको छ। वक्ताहरूले प्रशिक्षणमा बढी समय पाउनेछन्,” बरालले बताए ।
प्रशिक्षण कार्यक्रमले कांग्रेसका जिल्ला नेतृत्वलाई नीति, अनुसन्धान, र प्रशिक्षणको क्षेत्रमा थप दक्ष बनाउन महत्वपूर्ण भूमिका खेल्ने अपेक्षा गरिएको छ ।