बीरगन्ज,३० जेठ । सशस्त्र प्रहरी बल, नेपाल प्रादेशिक सुरक्षा गुल्म बीरगन्जले भारतबाट अवैध रूपमा भन्सार छली गरी ल्याइएका विभिन्न सामानहरू नियन्त्रणमा लिएको छ। बरामद सामग्रीको मूल्य करीब १३ लाख ४४ हजार रुपैयाँ बराबर पुगेको छ।
सशस्त्र प्रहरीले बीरगन्ज महानगरपालिका–१६ स्थित नगुवा गाउँको डम्पिङ साइट नजिकै गस्तीका क्रममा पाँच साइकलबाहकहरू मार्फत ल्याइँदै गरेको लत्ताकपडा र अन्य सामग्री नियन्त्रणमा लिएको थियो। बरामद कपडाको मूल्यांकन ७ लाख ६७ हजार ९ सय रुपैयाँ गरिएको छ भने त्यससँगै फेला परेको ना १६ प ६२७५ नम्बरको मोटरसाइकलको मूल्य १ लाख ५० हजार रुपैयाँ तोकिएको छ।
गुल्मबाट खटिएको अर्को टोलीले बीरगन्जको विभिन्न सीमावर्ती नाकाबाट लुकाइछिपाई ल्याइएका इलेक्ट्रोनिक सामग्री र अन्य सामानहरू पनि नियन्त्रणमा लिएको छ। ती सामानहरूको भन्सार मूल्याङ्कन ४ लाख २६ हजार १ सय २० रुपैयाँ गरिएको सशस्त्र प्रहरी नायव उपरीक्षक तथा सूचना अधिकारी देबेन्द्र बहादुर सिंहले जानकारी दिएका छन्।
सशस्त्र प्रहरीले सबै बरामद सामग्रीहरू आवश्यक कानुनी कारबाहीका लागि बीरगन्ज भन्सार कार्यालयमा बुझाएको जनाएको छ। साथै, प्रहरीले सीमावर्ती क्षेत्रमा भन्सार छली तथा अवैध कारोबार रोक्नका लागि निगरानी झनै कडा बनाएको पनि जनाएको छ।
