काठमाडौं,२२ असोज । अमेरिकी राष्ट्रपति डोनाल्ड ट्रम्पको दबाबपछि संयुक्त राज्य अमेरिकामा अगस्ट महिनामा जारी विद्यार्थी भिसा दर घटेको छ। अन्तर्राष्ट्रिय व्यापार प्रशासनका अनुसार अगस्टमा ३ लाख १३ हजार १३८ विद्यार्थी भिसा जारी भएका छन्, जुन सन् २०२४ को तुलनामा १९.१ प्रतिशतले कम हो।
विदेशी विद्यार्थीहरूको मुख्य स्रोत भारतमा भने सबैभन्दा ठूलो गिरावट आएको देखिएको छ। भारतबाट भिसा पाउने विद्यार्थीहरूको संख्या ४४.५ प्रतिशतले घटेको तथ्यांकले देखाएको छ।
चिनियाँ विद्यार्थीहरूको लागि भिसा जारी गर्ने क्रम पनि घटेको छ, तर भारतको तुलनामा त्यसको प्रभाव कम देखिएको छ। अमेरिकी अधिकारीहरूले अगस्टमा ८६ हजार ६४७ चिनियाँ विद्यार्थीलाई भिसा जारी गरेको जानकारी दिएका छन्, जुन भारतीय विद्यार्थीको दोगुना भन्दा बढी हो।
फेरि राष्ट्रपति ट्रम्पको प्रशासनले आप्रवासन नियन्त्रणलाई उच्च प्राथमिकता दिएको र विश्वविद्यालयहरूमाथि दबाब दिइरहेको छ। अमेरिकी विदेशमन्त्री मार्को रुबियोले गत जुनमा केही समयका लागि विद्यार्थी भिसा प्रक्रिया स्थगित गरिएको घोषणा गरेका थिए। यसले हजारौं विद्यार्थीको भिसा रद्द भएको थियो।
त्यस्तै, मुस्लिम बहुल देशहरूबाट आउने विद्यार्थीहरूको भिसा पनि तीव्र रूपमा घटेको छ। इरानबाट आउने विद्यार्थीहरूको संख्या ८६ प्रतिशतले घटेको तथ्यांकले देखाएको छ।
विशेषज्ञहरूको अनुसार, यस वर्ष जारी भिसा संख्यामा गिरावटले अमेरिकी विश्वविद्यालयमा विदेशी विद्यार्थीको समग्र संख्या र अन्तर्राष्ट्रिय शिक्षा क्षेत्रमा असर पार्न सक्छ।
