बारा,११ फागुन । राष्ट्रिय प्रजातन्त्र पार्टी (राप्रपा) ले बारा क्षेत्र नम्बर १ बाट प्रतिनिधिसभा सदस्यका लागि लक्ष्मीप्रसाद साहलाई उम्मेदवार बनाएको छ । कृषि पेशासँग आबद्ध, स्थानीय राजनीतिमा लामो समयदेखि सक्रिय र ग्रामीण समाजका मुद्दासँग नजिकबाट जोडिएका साहलाई राप्रपाले अनुभवी उम्मेद्वारका रूपमा अघि सारेको हो ।
वि.सं. २०२६ साल वैशाख १ गते जन्मिएका साह ठाकुर साह कलवार र पतसिया देवीका सुपुत्र हुन्। बारा जिल्लाको कोल्हवी नगरपालिका–१ मा जन्मिएका साहले औपचारिक शिक्षा एसएलसीसम्म हासिल गरेका छन् ।
तीन दशकभन्दा बढी समय नेपाली कांग्रेसको स्थानीय राजनीतिमा सक्रिय रहेका साह पेशाले कृषि कर्ममै संलग्न रहँदै आएका छन् । स्थानीय समाज, किसानका समस्या र ग्रामीण जीवनका सवालमा उनी लामो समयदेखि सक्रिय रहँदै आएका छन्।
साहको राजनीतिक यात्रा वि.सं. २०५६ सालदेखि सुरु भएको हो। उनले २०७८ सालसम्म निरन्तर नेपाली कांग्रेसको स्थानीय कमिटीमा रहेर सक्रिय राजनीति गरे। लामो राजनीतिक अनुभवपछि २०७८ सालमा कांग्रेस परित्याग गरी उनी राष्ट्रिय प्रजातन्त्र पार्टीमा आबद्ध भए।
२०७८ सालको प्रदेशसभा निर्वाचनमा साह बारा क्षेत्र नम्बर १ (क) बाट राप्रपाका तर्फबाट उम्मेद्वार बनेका थिए। उक्त निर्वाचनमा उनले तेस्रो स्थान हासिल गर्दै स्थानीय स्तरमा आफ्नो राजनीतिक उपस्थिति देखाएका थिए।
प्रतिनिधिसभा निर्वाचनमा साह पहिलो पटक उम्मेद्वार बनेका हुन्। हाल उनी राष्ट्रिय प्रजातन्त्र पार्टी बारा जिल्ला समिति सदस्य तथा केन्द्रीय महाधिवेशन प्रतिनिधिको जिम्मेवारीमा रहेका छन्।
कृषक पृष्ठभूमि, स्थानीय राजनीतिमा लामो अनुभव र संगठनप्रतिको निरन्तरताका कारण साहलाई राप्रपाले अनुभवी र जरा गाडिएको उम्मेदवार रूपमा अघि सारेको देखिन्छ।
