काठमाडौं,२६ जेठ । चालु आर्थिक वर्षको पहिलो १० महिनामा नेपालमा रेमिट्यान्स आप्रवाह उल्लेखनीय रूपमा बढ्दै १९ खर्ब १६ अर्ब ९० करोड रुपैयाँ पुगेको छ। नेपाल राष्ट्र बैंक ले सार्वजनिक गरेको ताजा आर्थिक तथा वित्तीय विवरणअनुसार वैशाखसम्म रेमिट्यान्स ४१.२ प्रतिशतले वृद्धि भएको हो।
अघिल्लो वर्षको सोही अवधिमा रेमिट्यान्स वृद्धि दर १३.३ प्रतिशत मात्रै रहेको थियो। यस वर्ष भने वैदेशिक रोजगारीबाट आउने आम्दानीमा तीव्र सुधार देखिएको छ, जसले देशको बाह्य क्षेत्र सुदृढ बनाउन महत्त्वपूर्ण योगदान दिएको छ।
वैशाख महिनामा मात्रै २ खर्ब ५७ अर्ब ४९ करोड रुपैयाँ रेमिट्यान्स भित्रिएको छ, जुन अघिल्लो वर्षको सोही महिनाको १ खर्ब ६५ अर्ब ३० करोडको तुलनामा उल्लेखनीय वृद्धि हो।
अमेरिकी डलरमा हेर्दा पनि रेमिट्यान्स ३३ प्रतिशतले बढ्दै १३ अर्ब २६ करोड पुगेको छ। यसले विदेशी मुद्राको सञ्चिति मजबुत बनाउन थप सहयोग पुगेको संकेत गर्छ।
त्यस्तै, खुद द्वितीय आय (ट्रान्सफर) बढेर २० खर्ब ९१ अर्ब ८६ करोड पुगेको छ, जुन अघिल्लो वर्षको १४ खर्ब ८० अर्ब २८ करोडको तुलनामा निकै उच्च हो।
वैदेशिक रोजगारीतर्फ पनि मिश्रित तस्वीर देखिएको छ। १० महिनामा नयाँ श्रम स्वीकृति लिने नेपालीको संख्या ३ लाख ३५ हजार ५१० पुगेको छ भने पुनः श्रम स्वीकृति लिनेको संख्या ३ लाख २६ हजार ३६४ रहेको छ। अघिल्लो वर्षको तुलनामा नयाँ जानेको संख्या घटे पनि पुनः जानेको संख्या बढेको देखिन्छ।
समग्रमा, रेमिट्यान्सको यो उच्च वृद्धि अर्थतन्त्रका लागि राहतको संकेत भए पनि दीर्घकालीन रूपमा वैदेशिक रोजगारीमा निर्भरता घटाउने चुनौती भने यथावत रहेको छ।
