काठमाडौं,२६ जेठ । उपराष्ट्रपति रामसहायप्रसाद यादवसँग नेपालका लागि इजिप्टका राजदूत शेरिफ मुस्ताफा अलसैयद अल्दिवानीले लैनचौरस्थित उपराष्ट्रपतिको कार्यालयमा शिष्टाचार भेटवार्ता गरेका छन्।
भेटका क्रममा दुई देशबीचको दीर्घकालीन मित्रता, आपसी सद्भाव र समझदारीका विभिन्न आयामबारे विचार आदानप्रदान भएको उपराष्ट्रपतिको कार्यालयले जनाएको छ।
उपराष्ट्रपति यादवले सन् १९५७ जुलाई १६ मा कूटनीतिक सम्बन्ध स्थापना भएयता नेपाल र इजिप्टबीच निरन्तर सुदृढ बन्दै गएको सम्बन्धप्रति सन्तोष व्यक्त गरे। उनले सन् १९६६ मा कायरोमा नेपालको र सन् १९७० मा काठमाडौंमा इजिप्टको दूतावास स्थापना हुनु दुई देशबीचको मित्रताको महत्वपूर्ण आधार भएको उल्लेख गरे।
त्यस्तै, लामो अन्तरालपछि कायरोमा बस्न लागेको नेपाल–इजिप्ट द्विपक्षीय परामर्श संयन्त्रको दोस्रो बैठकप्रति उनले खुशी व्यक्त गर्दै यसले नयाँ सहकार्यका क्षेत्रहरू खोल्ने विश्वास व्यक्त गरे।
उपराष्ट्रपति यादवले नेपाल र इजिप्ट दुवै असंलग्न राष्ट्रहरूको समूह (NAM)का संस्थापक सदस्य भएको स्मरण गर्दै संयुक्त राष्ट्रसङ्घ, जी–७७ तथा विश्व व्यापार संगठन जस्ता अन्तर्राष्ट्रिय मञ्चहरूमा सहकार्य हुँदै आएको बताए। उनले विश्वमा अन्याय, सिमान्तीकरण र गरिबी कायम रहेसम्म असंलग्न आन्दोलनको सान्दर्भिकता रहने धारणा पनि व्यक्त गरे।
यादवले असंलग्न आन्दोलनमा इजिप्टको ऐतिहासिक भूमिकाको प्रशंसा गर्दै नेपालका सरकारी अधिकारीहरूलाई तालिम तथा नेपाली विद्यार्थीलाई छात्रवृत्ति प्रदान गरेकोमा आभार व्यक्त गरे। साथै, इजिप्टको राष्ट्रिय दिवसको अवसरमा राष्ट्रपति, सरकार र जनताप्रति शुभकामना व्यक्त गर्दै द्विपक्षीय सम्बन्ध अझ प्रगाढ हुने विश्वास व्यक्त गरे।
भेटमा राजदूत अल्दिवानीले नेपाल–इजिप्ट सम्बन्धलाई थप सुदृढ बनाउने प्रतिबद्धता जनाउँदै इजिप्ट नेपाललाई विशेषगरी सैनिक र कृषि क्षेत्रमा सहयोग गर्न इच्छुक रहेको बताए। उनले नेपालमा रासायनिक मल आपूर्ति गर्न तथा इजिप्टका कृषि विशेषज्ञहरूलाई नेपाल पठाएर कृषि क्षेत्रको विकासमा योगदान गर्न तयार रहेको उल्लेख गरे।
साथै, आफ्नो कार्यकालमा नेपाली विद्यार्थीहरूका लागि इजिप्टले उपलब्ध गराउँदै आएको छात्रवृत्तिको संख्या वृद्धि गर्ने प्रयास रहने पनि उनले बताए।
