काठमाडौँ,२९ जेठ । सूचना तथा विज्ञापनसम्बन्धी सरकारी निर्णय विभेदकारी र स्वेच्छाचारी भएको आरोप लगाउँदै पत्रकारहरूले काठमाडौंमा प्रदर्शन गरेका छन्।
नेपाल पत्रकार महासंघ काठमाडौं शाखाको अगुवाइमा बुधबार बिहान बबरमहलस्थित सडक विभागको भवन अगाडि भेला भएका पत्रकारहरूले करिब एक घण्टा प्रदर्शन गरेका थिए।
प्रदर्शनमा सहभागी पत्रकारहरूले सरकारको हालको सूचना तथा विज्ञापन नीति प्रेस स्वतन्त्रता र समान अवसरविरुद्ध रहेको दाबी गरेका छन्। उनीहरूले उक्त निर्णय तत्काल खारेज गर्न माग गरेका छन्।
त्यस्तै, प्रेसको संवैधानिक अधिकारको रक्षा गर्न, सूचना प्रवाहलाई निर्वाध बनाउन तथा संसदमार्फत सर्वपक्षीय कार्यदल गठन गरी आवश्यक संविधान संशोधन प्रक्रिया अघि बढाउनुपर्ने माग पनि उनीहरूले उठाएका छन्।
प्रदर्शनकारीहरूले सरकारी निर्णयले सञ्चार क्षेत्रलाई प्रभावित पारेको भन्दै निष्पक्ष नीति निर्माणको आवश्यकता औँल्याएका छन्।
