वीरगन्ज,२९ जेठ । सरकारी सूचना तथा विज्ञापन वितरणमा विभेदकारी निर्णय गरिएको विरोधमा पर्सासहित देशभरका सञ्चारकर्मीहरूले दोस्रो दिन पनि धर्ना कार्यक्रम जारी राखेका छन्।
नेपाल पत्रकार महासंघको आह्वानमा ७७ जिल्लामा एकसाथ सुरु गरिएको आन्दोलनअन्तर्गत पर्सामा पनि जिल्ला प्रशासन कार्यालय अगाडि बिहान ११ बजेदेखि १२ बजेसम्म एक घण्टा धर्ना दिइएको हो। कार्यक्रममा सहभागी सञ्चारकर्मीहरूले सरकार प्रेस स्वतन्त्रतामाथि हस्तक्षेप गर्दै निरंकुशतातर्फ अघि बढेको आरोप लगाएका छन्।
महासंघका केन्द्रीय सचिव अशोक तिवारीले निजी तथा सामुदायिक सञ्चारमाध्यममाथि प्रहार गरी जनताको आवाज दबाउने प्रयास भइरहेको आरोप लगाए। उनले पत्रकारहरूको माग बेवास्ता गरिए आन्दोलन अझ सशक्त बनाइने चेतावनी दिए।
त्यसैगरी महासंघका लेखा समिति संयोजक केशी लामिछानेले सरकारी विज्ञापन केवल सरकारी सञ्चारमाध्यमलाई दिने निर्णय अधिनायकवादी सोचको उदाहरण भएको टिप्पणी गर्दै संविधानले सुनिश्चित गरेको सञ्चारमाध्यम छनोटको अधिकारमाथि हस्तक्षेप भएको दाबी गरे।
नेपाल पत्रकार महासंघ मधेश प्रदेशका अध्यक्ष श्याम बञ्जाराले प्रधानमन्त्री तथा मन्त्रिपरिषद्को कार्यालयबाट चैत १८ गते जारी पत्राचारका कारण देशभरका सञ्चारगृह प्रभावित भएको उल्लेख गर्दै उक्त निर्णय तत्काल फिर्ता लिन सरकारसँग माग गरे।
पर्सा शाखा अध्यक्ष ओमप्रकाश खनालले सरकारले प्रेसमाथि नियन्त्रण गर्ने प्रयास गरिरहेको आरोप लगाउँदै यस्तो कदम स्वीकार्य नहुने स्पष्ट पारे। उनले प्रेस स्वतन्त्रता र लोकतन्त्र एकअर्काका आधारस्तम्भ भएको उल्लेख गरे।
धर्ना कार्यक्रममा विभिन्न पत्रकार संगठनका प्रतिनिधि, सञ्चारमाध्यमका सञ्चालक तथा पत्रकारहरूको उल्लेखनीय उपस्थिति रहेको थियो।
आन्दोलनरत पक्षले सरकारी सूचना तथा विज्ञापन वितरणमा देखिएको विभेद अन्त्य गर्न, सञ्चारमाध्यमप्रति समान व्यवहार गर्न तथा संविधानप्रदत्त प्रेस तथा अभिव्यक्ति स्वतन्त्रताको सम्मान गर्न सरकारसँग माग गरेका छन्। साथै, प्रेस स्वतन्त्रतामाथिको कुनै पनि हस्तक्षेप सह्य नहुने चेतावनी दिएका छन्।
