काठमाडौँ,२९ जेठ । काठमाडौँमा प्रतिनिधि सभा बैठकमा अर्थमन्त्री डा. स्वर्णिम वाग्लेले संसद्को अधिकारबारे महत्वपूर्ण टिप्पणी गरेका छन्। विनियोजन विधेयकमाथिको छलफलका क्रममा उठेका प्रश्नहरूको जवाफ दिँदै उनले सरकार बनाउने र आवश्यक परे ढाल्ने अधिकार संसद्सँगै रहेको स्पष्ट पारे।
राष्ट्रिय प्रजातन्त्र पार्टी (राप्रपा) प्रमुख सचेतक खुश्बु ओलीले बजेट कार्यान्वयन र कार्यपालिकासम्बन्धी विभिन्न संयन्त्रबारे प्रश्न उठाएपछि मन्त्री वाग्लेले जवाफ दिएका हुन्।
उनका अनुसार नेपाल संसद सार्वभौम संस्था हो, जसले सरकार नियुक्त गर्ने र आवश्यकता अनुसार परिवर्तन गर्ने अधिकार राख्छ। “मन नपरेको खण्डमा सरकार नै फाल्ने अधिकार यही थलोले राख्छ,” उनले भने।
मन्त्री वाग्लेले संसदीय प्रणालीमा सत्ता परिवर्तन अन्ततः गणितीय बहुमतमा निर्भर हुने उल्लेख गर्दै सरकार गठन र विघटन दुवै राजनीतिक सहमतिमा आधारित हुने बताएका छन्।
