जनकपुर,३० जेठ । नेपाली कांग्रेसमा विशेष महाधिवेशनको मागलाई लिएर आन्तरिक विवाद बढिरहेका बेला संस्थापन पक्षप्रति असन्तुष्ट नेताहरूले मधेश प्रदेशमा छुट्टै प्रदेशस्तरीय कार्यकर्ता भेला आयोजना गरेका छन्। जनकपुरधाममा सम्पन्न उक्त भेलालाई पार्टीभित्र बढ्दो असन्तुष्टि र शक्ति प्रदर्शनको संकेतका रूपमा हेरिएको छ।
पूर्वउपसभापति विमलेन्द्र निधिको प्रमुख आतिथ्यमा आयोजित कार्यक्रममा मधेश प्रदेशका विभिन्न जिल्लाका नेता तथा कार्यकर्ताहरूको उल्लेखनीय सहभागिता रहेको थियो। आठ जिल्लामध्ये महोत्तरीका सभापति नागेश्वर यादव तथा बाराका सभापति राजेशप्रसाद राय यादव पनि कार्यक्रममा सहभागी भएका थिए। भेला बाराका सभापति राजेशप्रसाद राय यादवको अध्यक्षतामा सम्पन्न भएको थियो।
कार्यक्रममा पूर्वकेन्द्रीय सदस्य मोहनबहादुर बस्नेत, गुरुप्रसाद बराल, पूर्व सहमहामन्त्री उमाकान्त चौधरी तथा संविधानसभा सदस्य प्रेमकिशोर शाहलगायत नेताहरूको उपस्थिति देखिएको थियो। तर संघीय संसद् तथा मधेश प्रदेशसभाका सांसदहरूको सहभागिता भने देखिएन।
विशेष महाधिवेशनको विपक्षमा रहेका नेताहरूले यसअघि नै मधेश प्रदेशस्तरीय गतिविधिको संयोजनको जिम्मेवारी पूर्वसांसद आनन्द ढुंगानालाई दिएका थिए। सोही रणनीतिअनुसार आयोजित यो भेला असन्तुष्ट पक्षको संगठित उपस्थितिको रूपमा हेरिएको छ।
पार्टीभित्र विशेष महाधिवेशन, संगठनात्मक संरचना तथा नेतृत्व शैलीलाई लिएर मतभेद चुलिँदै गइरहेका बेला यो भेला संस्थापन पक्षमाथि दबाब सिर्जना गर्ने प्रयासका रूपमा विश्लेषण गरिएको छ। असन्तुष्ट समूहले प्रदेशस्तरमै आफ्नो प्रभाव र समर्थन देखाएर पार्टी नेतृत्वलाई स्पष्ट राजनीतिक सन्देश दिन खोजेको बुझिएको छ।
कांग्रेसभित्र बढ्दो गुटीय ध्रुवीकरण र नेतृत्वसम्बन्धी बहसले आगामी दिनमा पार्टीको आन्तरिक राजनीति अझ जटिल बन्न सक्ने संकेत देखिएको छ।
